平凡香港女生小天地

好似之前既文章提及過, 吸引我踏上煮食之路, 係我唔再想係屋企百無聊賴, 想有一個嗜好寄託.

以前, 我只懂得繡花 (雖然而家都繼續), 上網, 聽歌, 但呢幾種嗜好, 並不能好好帶給我最實在既感覺. 自從買左光波爐, 麵包機, 豆漿機之後, 做出黎既成品令屋企人滿意, 更甚至期待, 我係好感恩. 而家自己都大個了, 爸爸今年 7 月中退休, 作為女兒, 都要好好為家庭付出.

我唔敢講自己好孝順, 只祈求父母退休生活愉快, 可以享受平淡既幸福.

製作麵包, 真係唔難. 我要先說, 多謝上天俾我一個容易滿足, 不挑食既性格. 噚日 (13/4), 媽媽問我: 阿女, 你聽日會整咩包, 我答: 你話事丫, 媽媽再回應: 我學你咁, 有得食就得喇. 係呢一刻, 我真係好感動. 屋企人給予既支持, 真係十分十分重要. 所以, 我唔奢求甚麼, 只渴求安穩既生活便可以.

麵包, 用上麵包機 (我: 德國寶 BMR-7075) 真係方便好多. 沒有甚麼值得一提煮食經驗既人的我, 都可以輕易而舉, 透過麵包機, 焗出美麗的包包. 想當然, 透過麵包機整出黎既包包, 冇得同手搓包比較架.

光波爐, 我主要用黎整蛋糕, 曲奇, 同埋焗手搓包, 以下呢款係之前整既歐式全麥提子杏脯包. 慶幸出包屋企人都鍾意食 ^^

豆漿機的成品, 未有影相呀, 有機會同大家分享. 而家, 我又要睇書, 睇下今晚整咩包囉 ^+++^